Më 26 mars, shefi i Zyrës për Kosovën në Qeverinë e Serbisë, Marko Gjuriq hyri në Kosovë pa leje, për cka reaguan menjëherë institucionet e vendit, duke dhënë urdhër për arrestimin e tij.

Në këtë aksion morën pjesë dhjetëra pjesëtarë të Policisë së Kosovës, por ishin trupat e Njësisë Speciale Intervenuese që arrestuan Gjuriqin gjatë një tubimi që po mbante me serbët e veriut, shkruan Indeksonline.

Sjellja e policëve të Kosovës gjatë arrestimit të Gjuriqit, nuk i kishte pëlqyer zëvendësministrit të Punëve të Brendshme nga komuniteti serb, Milan Radojeviq, sipas të cilit në këtë aksion u përdor dhunë.

Me kërkesë të tij, Inspektorati Policor i Kosovës (IPK)ka nisur të mbledh informacione në lidhje me dyshimet për shkelje eventuale të rregullave nga zyrtarët policor.

Tani që janë bërë pothuajse dy muaj nga arrestimi i Gjuriqit, IPK po vazhdon të merret me ankesën e zv/ministrit Radojeviq.

Në një përgjigje për Indeksonline, IPK ka njoftuar se misioni i tij është që përmes ushtrimit të veprimtarisë së tij, të sigurojë një shërbim policor të përgjegjshëm, demokratik dhe transparent, në përputhje me legjislacionin në fuqi dhe standardet e kërkuara.

Prandaj, në përputhje me këtë mision dhe fushëveprimin ligjor IPK merr masa dhe veprime hetimore në rastet kur dyshohet se pjesëtarët e Policisë së Kosovës kanë kryer veprime që bien ndesh me ligjin e PK-së dhe aktet tjera nënligjore të Policisë.

“Edhe në lidhje me rastin e arrestimit të z. Marko Gjuriq, IPK respektivisht Departamenti i Hetimeve ka filluar me mbledhjen dhe grumbullimin e informacioneve në lidhje me dyshimet për shkelje eventuale nga ana e zyrtarëve të Policisë së Kosovës. Lidhur me këtë operacion policor, IPK ka pranuar një ankesë nga zv. Ministri i Punëve të Brendshme, lidhur më disa dyshime për tejkalim të përdorimit të forcës nga ana e zyrtarëve Policor”, thuhet në përgjigje.

Hetuesit e IPK-së do të vazhdojnë të ndërmarrin edhe veprime të tjera hetimore varësisht nga të gjeturat e këtij procesi të grumbullimit të informacioneve dhe në konsultim me prokurorin kompetent.​